Written by: Kriti Nepal - 2023016, Grade IX
Posted on: 01 October, 2020
अनलाइन कक्षा शिक्षण सिकाइको वैकल्पिक माध्यम हो । वर्तमान समय सङ्कट र महामारीको समय हो । अहिले हामी सबैलाई थाहा नै छ कि कोभिड -१९ ले विश्वमा आतङ्क फैलाएको छ भने १० लाख जति मानिसले यही रोगका कारण ज्यान पनि गुमाइ सकेका छन् । कोरोना महामारीकै कारण अहिले विद्यालय बन्द छन् । व्यापार व्यवसाय बिस्तारै पुरानै गतिमा फर्कँदै छन् । यस्तो अवस्थामा हामी घरमै बसेर अनलाइन कक्षा लिइरहेका छौँ । हाम्रो विद्यालयले पनि अनलाइन कक्षाको सुरूवात वैशाख महिनादेखि नै गरेको थियो र अहिलेसम्म पनि चलिरहेको छ ।
वैशाख १५ गतेबाट सुरू भएको अनलाइन कक्षा निकै व्यवस्थित छ । अनलाइन कक्षा व्यवस्थित भएकाले हामीलाई कक्षा लिन गाह्रो भएन । अनलाइन कक्षामा पढ्दा मैले निकै राम्रा अनुभव र यसका फाइदाहरू पनि सिकें । नियमित विद्यालय जान जस्तो हतार पनि नहुने, धुलो धुँवाबाट पनि बचिने र घर नै विद्यालय हुने । हुनत पहिलो विद्यालय भनेको घर नै हो । घरबाट नै धेरै कुरा सिकेका हुन्छौँ । तर सधैँभरि घरबाट सिकेका कुराले नपुग्दो रहेछ । विद्यालय जान नपाए पनि अहिले घर नै विद्यालय भएको छ । विद्यालय, शिक्षक र परिवारले घरलाई नै विद्यालय बनाइदिनु भएको छ । यो म जस्ता सबै विद्यार्थीका लागि खुसीको कुरा हो । अनलाइन कक्षा पढ्दा मैले कहिले नचलाएका र पढ्नको लागि सजिला विभिन्न वेबसाइटहरूबारे थाह पाएँ । यिनीहरूको प्रयोगले मेरो ज्ञानको क्षेत्रलाई अझ फराकिलो बनाएका छन् । अहिले त घरमै बसेर पढ्ने बानी परिसकेकको छ । अनलाइन कक्षामा रमाएर पढेका छौँ। तर विद्यालयका साथीहरूसँग प्रत्यक्ष रूपमा भेट हुने अवसर भने पाइएको छैन । एकछिन पनि घरबाट बाहिर निस्कन नपाउँदा पनि चित्त बुझाउनु पर्ने भएको छ ।
अनलाइन कक्षा विद्यालयमा जस्तो प्रत्यक्ष रूपमा विद्यार्थीहरू सार्वजनिक रूपमा कुराकानी गर्न सहज छैन । यसका साथसाथै मैले यो अनलाइन कक्षामा भोगेको बेफाइदा भनेको कक्षा समयमा बत्ती जानु र इन्टरनेटले समय समयमा काम नगर्दा चाहेर पनि कक्षामा उपस्थित हुन नसक्नु हो । कति कति बेला विभिन्न प्राविधिक समस्याले गर्दा पनि कक्षामा सहभागी हुन सकिँदैन। इन्टरनेट राम्ररी चलेको छैन भने शिक्षकले बोलेको आवाज पनि राम्ररी सुन्न सकिँदैन । अनलाइन कक्षामा भन्दा विद्यालयमा नै गएर पढ्न पाए अझै राम्रो र सजिलो अनि फाइदाजनक हुन्थ्यो होला ।