आमा

Written by: Dison Dangol - 32048, Grade IV

Posted on: 26 July, 2023

आमाले हामीलाई जन्म दिनुभयाे । आमा महान् व्यक्ति हुनुहुन्छ । आमा हाम्रो जीवनको सबैभन्दा महत्त्वपूर्ण व्यक्ति पनि हुनुहुन्छ । जसले हामीलाई नाै महिना कोखमा राखेर अनेकौ दुःख, कष्ट, पीडा सहेर जन्म दिनुहुन्छ र अत्यन्त प्रेमपूर्वक लालन पालनगरि हुर्काउनुहुन्छ । आमाले हाम्रो सुख दुःखमा सामेल भई हरपल हाम्रो खुसीको लागि आफ्ना इच्छा चाहनाको त्याग गर्नुहुन्छ । आमा मात्र एक त्यस्तो व्यक्ति हनुहुन्छ जसले हाम्रो हरेक दुःख र पीडाको अनुभूति गर्न सक्नुहुन्छ र हामीलाई धैर्य गरी अघि बढ्न प्रेरित गर्नुहुन्छ । आमा हाम्रो जीवनको अनमाेल रत्न हुनुहुन्छ । आमाकाे काख एउटा त्यस्तो स्थान हो जहाँ हामी खुसी भई आफूलाई सुरक्षित महसुस गर्न सक्छौँ । आमाको त्यही न्यानो माया हाम्राे पहिलो पाठशाला हो । हामी सुरुमा आमाको हात समातेर हिँड्न र ताेते बोलीबाट बोल्ने गर्छाैँ । हामीले सबैकुरा एकएक गरेर आमासँग सिक्छाैँ । आमाले हाम्रो मनको  कुरा बुझेर हामीलाई सही गलत सम्झाएर ज्ञानी,गुनी,बुद्धिमानी,बनाई जीवनको लक्ष्यतिर अघि बढ्न हौसला प्रदान गर्नुहुन्छ । त्यसैगरी सामाजिक मूल्य, मान्यताहरू सिकाएर हामीलाई शिष्ट, भद्र, नैतिकवान बनाउनुहुन्छ । जसले गर्दा हामी सबैसँग राम्रो व्यवहार गर्न सक्छौँ । राष्ट्रको एक असल नागरिक बन्छौँ । आमा माया र ममताकी खानी  हुनुहुन्छ । जो आफ्नो सन्तानकाे मात्र नभई सम्पूर्ण परिवारको सुख, शान्ति र समृद्धिको लागि खटिरहने हुनुहुन्छ । आमा बिहान सबेरै उठ्ने, घरको सरसफाइ गर्ने, पूजापाठ गर्ने, खाना बनाएर सबैलाई खुवाउने, फूलबारीमा गोडमेल गर्ने आदि कामहरू गर्नुहुन्छ । थाकेको भएपनि नथाके झैँ गरी मुहारमा मुस्कान राखेर हरपल हाम्रो सेवामा तत्पर रहनुहुन्छ । आमा हाम्रो पहिलाे शिक्षक अनि घनिष्ट मित्र पनि हुनुहुन्छ । हामीलाई जीवन जिउने कला सिकाउनुहुन्छ ।