Written by: Manisha Gurung - 22030, Grade XII
Posted on: 21 April, 2022
छुटेकाे मान्छेको नि पछि मिलन हुन्छ भन्छन्,
तर खै टुटेको मनको पनि मलम पट्टी हुन्छ र ?
बोलेको शैलीले मन दुखेसरि भनौँला नि भन्छौ,
तर के वचनले घोचेको घाउको औषधि पनि हुन्छ र ?
वाचा कसम गरेर पनि मानिस चटक्क छोडेर जान्छन्,
तर के कसम र विश्वासको पनि खेल हुन्छ र ?
झुटैझुटको सम्बन्धमा साँचो बोल्नुपर्छ भनेर ज्ञान दिन्छन्,
तर के त्यो साँचो र आफूभित्रको सच्चाइकाे कदर हुन्छ र ?
विश्वासको मतलब थाहा नहुनेहरू मलाई भरोसा गर भन्छन्,
तर के त्यो गरेको विश्वासको सम्मान त्यहाँ हुन्छ र ?
धन र पैसाको आडमा मानिस माया किन्न खोजिरहेको छ,
तर के त्यो धनाड्यलाई मायाको अर्थ थाहा हुन्छ र ?
आज एउटासँग देखेको मान्छे भोलि अर्कोसँग देख्छु,
साँच्चै के साँचो माया पनि असारे भेल हुन्छ र ?
हुन त छुटेकाे मान्छेको पनि पछि मिलन हुन्छ भन्छन्
तर खै टुटेको मनको पनि मलम पट्टी हुन्छ र ?