बाबाको सपना

Written by: Yojana Gautam - 23068, Grade XI

Posted on: 09 December, 2021

छोरी टुकुटुकु हिँड्दै गर्दा 
भर्खर बामे सर्दै गर्दा 
सिसाकलमले दिदीको गृहकार्य गर्ने कापीमा
बाङ्गोटिङ्गो कोर्दै गर्दा 
अनि पहिलो चोटि स्केल भट्टा अनि सिमीको एक मुठी पात चुँडेर 
दिदीको पछिपछि उफ्रिँदै स्कुल जाँदै गर्दा 
मभित्रका इच्छा आकाङ्क्षाहरू परिवर्तन हुन्छन् समयानुकूल 
तर बाबाले देख्न सुरु गर्नुभएको छ एउटै सपना 
जस्तोसुकै कठिन घडीमा पनि 
आँधीहुरी या सङ्कटमा पनि 
छोरीलाई इन्जिनियर बनाउने सपना ।

स्कुलमा पढेकी थिएँ, 
गुरुहरूबाट सुनेकी थिएँ, 
सपना केवल सपना मात्रै होइन,
यो एउटा भविष्यको मार्गचित्र हो, 
सायद त्यही मार्गचित्र जुन मैले मेरो निम्ति कोर्न सक्ने हुनुभन्दा निकै पहिले 
मेरो निम्ति मेरो बाबाले कोरिसक्नुभएछ ।

सपना सोचेर कहिलेकाहीँ अत्यास लाग्थ्यो,
त्यही पल्लो गाउँको सरकारी स्कुल त हो नि 
धन्न निःशुल्क थियो र हाम्रो पहुँचमा थियो,
पुरानै लुगा लगाएर भए पनि चुँडिएको चप्पलकाे सहारामा 
सपनाको अजङ्गकाे भारी 
सकिनसकी वहन गरेर किताबका पानाहरू 
अनि गुरुहरूको आदर्श वचनमा 
अनि बाबा आमाको करुण मुस्कुराहटमा 
मैले सपना पुरा गर्ने यथेष्ट आधारहरू भेटिसकेकी थिएँ ।

सपना देखेर निदाएका कयौँ पलहरू छन्, 
सपना भुलेर हराएका कैयौँ कालहरू छन्, 
म स्वयम्‌मा नै लडेर अघि बढेका
कैयौँ पलहरू सम्झन्छु, 
सहज त के छ र यो दुनियाँमा ?
खडेरी परेर चर्केका खेतहरूभन्दा 
ऋण तिर्न भनी बिदेसिएका छोराछोरी 
काठको बाकसमा फर्केको बेलाको आमाको मन हेर्छु, 
र बाबाको सपना सझन्छु ।

अब बाबाको सपना केवल बाबाको मात्र रहेन, 
सपना झन् प्यारो लाग्न थालिसकेछ, 
जब थाहा नपाई बाबाको सपनालाई
मैले आफ्नै सपना बनाइसकेकी रहेछु ।