Written by: Binayak Mahato - 22025, Grade XII
Posted on: 09 December, 2021
कोरोना भाइरसको हल्ला विश्वभर फैलँदा विभिन्न ठाउँका मानिसहरू अति नै आत्तिएका थिए । कोही आफ्ना आफन्तका लागि भने कोही आफ्ना घरपरिवारका लागि । मानिसको मानसिकतामा यो कोरोनाको निकै डरलाग्दो असर देखिएको छ । मानिसहरूमाझ यो एउटा महामारी मात्र नभएर यसले अर्कै नै डरलाग्दो रूप लिन पुगेको छ । कोरोनाले जागिरेको जागिर गुमाइदिएको छ भने यहाँ यसले देशका भविष्य यी साना कलिला बालबालिकाको पढाइमा ठुलो असर परेको छ । हुन त हामी कसैले जा भनेर जाने पनि हैन यो महामारी । बस्, केवल हामीले गर्न सक्ने भनेको सावधानी अपनाउन मात्र हो । आजभोलि मानिसको मस्तिष्कमा यो महामारीले निकै धेरै डरलाग्दो जोखिम पनि ल्याएको छ ।
पहिला मानिसलाई १०२ डिग्री ज्वरो आउँदा पनि तातो पानी, औषधी र डाक्टरको केही सरसल्लाहले ठिक हुने त्यो ज्वरोले आज यस्तो रूप लिन पुगेको छ । मानिसको सोच नै परिवर्तन गरिदिएको छ याे रोगले । हेर्ने हो भने यो रोगभन्दा ठुलो महामारी त हाम्रो दिमागमा भएको यो रोगप्रतिको डर र त्रास रहेको छ । आजभोलि घरको कोही एक सदस्यलाई ज्वरो, रुघाखोकी लाग्दा उसलाई त्यो रोगले सताएको भन्दा बढी त बाँकी सदस्यले उसलाई कोरोना लागेको हो कि भन्ने चिन्ताले उसलाई भित्रभित्रै खाएको हुन्छ । एउटा सानो कुरा गरौँ, हिजो भर्खरको । मेरो साथीको बुवालाई ज्वरो आइरहेको रहेछ । उसले मलाई फोन गरेर पहिलो शब्द के बोल्यो भने, "हेर न विनायक ! बुवालाई त कोरोन लागेछ ।" मैले उसलाई तत्कालै त केही भनिनँ, बस्, यस्तै कता जानुभयो ? कस्तो छ अहिले ? भन्ने कुरा गरेँ । ऊ आत्तिँदै थियो कि यदि गाह्राे नै भइहाल्यो भने त राती नै अस्पताल लानुपर्छ होला भनेर तर मैले उसलाई त्यस्तो केही हुन्न भनेर सान्त्वना दिएँ । मैले उसलाई भन्दै थिएँ, "हेर साथी, केही हुन्न त्यस्तो, चिन्ता नमान । कोरोन पक्का हैन होला । यस्तै अलि थाकेर पनि ज्वरो आएकाे हुन सक्छ । हेर साथी, अहिले भनेको हाम्रो दिमागमा पनि त्यही कोरोनाको डर चलिरहेको छ । एकचोटि सोचिहेर त, पहिला ज्वरो आउँदा हामी नै हौँ नि त्यो औषधी खाएर निको हुने तर अहिले भने यो रोगले भन्दा पनि हाम्रो यो रोगप्रतिकाे नकारात्मक सोचले बढी पीडित बनाएको छ हामीलाई ।" त्यत्तिकैमा आज बिहान उसको बुवाले पिसिआर गराउनु हुँदा त्यो काेरोना थिएन । डाक्टरले हेर्नु हुँदा निमाेनिया भएकाे रहेछ भनेर भन्नुभयो ।
मैले यो पनि भन्न खोजेको हैन कि कोरोनले केही गर्न सक्दैन र यो केही हैन । यो एउटा ठुलो महामारी हो, हामी यसबाट बच्नुपर्छ तर आजभोलि जो मानिस याे रोगबाट पीडित छन्, उनीहरूलाई हेर्ने यो समाजको नजर बदल्न पाए केही राम्रो हुन्थ्यो कि भन्ने मात्र मेरो भावना हो । जो मानिस कोरोनबाट सङ्क्रमित छन्, उनीहरूलाई हामीले राम्रो नजरले हेर्यौं भने उनीहरूलाई पनि त्याे रोगसँग लड्ने क्षमता केही हदसम्म बढ्छ होला ।
