Written by: Niharika Shrestha - 22022, Grade XI
Posted on: 23 February, 2021
सबैको जीवनमा बाल्यकाल सबैभन्दा रमाइलो र यादगार समय हो । कसैले पनि बाल्यकालका घटनाहरू बिर्सिन सक्दैनौँ चाहे ती सुखद हाेउन् वा पीडादायी । बाल्यकाल त्यो समय हो जसले भविष्यलाई आकार दिन्छ । सबैका आआफ्नै अनुभव हुन्छन् र ती अनुभवहरूलाई हामीले जीवनभरि नै सम्झन्छौँ । यसबाहेक यो जीवनको सुनौलो अवधि हो जसमा हामी नैतिक मूल्य, अनुशासन आदि सिक्न सक्छौँ ।
मेरो बाल्यकालको बारेमा कुरा गर्दा म काठमाडौँमा जन्मेर हुर्किएकी हुँ । म मेरा आमाबुबाकी एक्ली सन्तान हुँ, यद्यपि म एक्ली छाेरी हुँदा पनि मलाई त्यस्तो एकाकीपन महसुस भएन किनभने हामी संयुक्त परिवारमा बस्छौँ । मेरा दुईजना दाइ, एउटा भाइ र एउटी बहिनी छन् । हामी सबै बच्चामा निक्कै खेल्थ्यौँ । हामीले यति धेरै सम्झनाहरू बनाएका छौँ कि हामी अहिले ती घटना सम्झिँदै हाँस्दछौँ । हामी फुटबल, लुकाछुपी, दौड र अन्य धेरै खेलहरू खेल्थ्यौँ । एउटै घरमा सबै परिवार बस्दा छुट्टै रमाइलो हुन्छ । सबै चाडपर्व सँगै मनाउन पाइन्छ । बाल्यकालमा मलाई दसैँ, तिहार र होली निक्कै मन पर्थे । होलीमा हामी सबै बच्चाहरू मिलेर एकअर्कालाई रङ्ग लगाउँथ्यौँ, पानी छ्याप्थ्यौँ अनि घरमा निक्कै रमाइलो वातावरण हुन्थ्यो । हामीलाई हाम्रो हजुरबुवाले घुमाउन लग्नु हुँदा निक्कै खुसी लाग्थ्यो । हजुरआमाले पनि हामीलाई चकलेटहरू किनिदिनुहुन्थ्यो र हामी सबै मिलेर खन्थ्यौँ । हामी बच्चाहरू छुट्टाछुट्टै विद्यालयमा पढ्थ्यौँ त्यसकारण कसैको एक दिन छुट्टी हुँदा अरूको हुँदैनथ्यो अनि हामीमध्ये एकजनाको छुट्टी भयो भने हामी सबै विद्यालय जानु परेकामा रुन्थ्यौँ । आहिले यो सबै सोच्दा निक्कै हाँसो लाग्छ । मेरो बाल्यकाल मामाघरमा पनि निक्कै बित्यो । मलाई मामाघर जान निक्कै रमाइलो लाग्थ्यो र अझ पनि लाग्छ । लामो बिदा हुनेबित्तिकै म मामाघर गइहाल्थेँ । त्यहाँ मेरी हजुरआमाले मलाई एकदम माया गर्नुहुन्छ र उहाँको हातबाट बनेकाे मिठो खाने कुरा मलाई एकदमै मन पर्छ । मेरा आमाबुबासँगको सम्बन्ध निक्कै घनिष्ट थियो र अझ पनि छ । उहाँहरूले बाल्यकालमा मलाई चाहिएका कुराहरू, मेरा इच्छाहरू सबै पुरा गर्दिनुहुन्थ्यो । नराम्रो कुरा गरेमा गाली पनि गर्नुहुन्थ्यो । यसरी नै मैले राम्रो र नराम्रो कुराबिचकाे फरक थाहा पाएँ ।
मेरो बाल्यकालका दिनका सम्झनाहरू मेरो दिमागमा अझै ताजा छन् । बाल्यावस्था पक्कै पनि मेरो जीवनको मन पर्ने चरण हो । यी सबै सम्झनाहरू म सधैँ मस्तिष्कमा साँचिराख्ने छु । कहिलेकाहीँ ती रमाइला दिनहरू फिर्ता आउन् जस्तो पनि लाग्छ तर हामीसँग आहिले बाँकी रहेका कुरा भने ती क्षणका यादहरू मात्र हुन् । बाल्यकालका दिनहरू र तिनकाे सम्झना म कहिले बिर्सिन सक्दिनँ ।
