Written by: Rushina Tamang - 26008, Grade VIII
Posted on: 10 May, 2021
विश्वमा कोरोना भाइरसले निकै नै आक्रान्त पार्याे । धेरै मानिसहरूको मृत्यु भयो । लामो समयसम्म विद्यालय, पसल, यातायात र विमानस्थल पूर्णरूपमा बन्द भए । एकातिर आफू पनि सङ्क्रमित भइने हो कि भन्ने डर थियो भने अर्कोतिर अनलाइन कक्षा लिँदा लिँदा कम्प्युटर र मोबाइलमा हेर्दा आँखा नै भतभत पाेल्थे र हेर्न गाह्रो हुन्थ्यो । यसरी कोरोनाभाइरसको डर र त्रासका बीचमा हामीले झण्डै ११ महिना बितायाैँ ।
११ महिनाको घरको बसाईँको समयमा हामीले घरमै बसेर पनि धेरै कुराहरू सिक्न पायाैँ । कम्प्युटर र मोबाइल चलाउँदा चलाउँदै हामीले नयाँ नयाँ सिर्जनाहरू पनि रचना गर्याैँ । ल्यापटपमा सामग्री, बनाउने, नेपालीमा टाइप गर्ने, धेरै किसिमका बैठकहरूमा जोडिने, यस्ता कुराहरू हामीले अनलाइन कक्षाबाट सिक्याैँ भने अनलाइनमार्फत नै हामीले सामूहिक परियोजना कार्यहरू पनि गर्याैँ । कक्षा लिने क्रममा हामीले धेरै समस्याहरू भोग्नु पर्याे । कहिलेकाहीँ कक्षा लिँदालिँदै बत्ती जान्थ्याे त कहिले इन्टरनेट जान्थ्यो भने कहिले शिक्षकको नै इन्टरनेट अथवा बत्ती गएर हाम्रो कक्षा अवरुद्ध हुन्थ्याे । ११ महिनाको घरको बसाईँपश्चात हाम्रो विद्यालय खुल्यो । विद्यालय खोल्ने खबर सुन्दा म खुसीले फुरुङ्ग भएँ र एकपटक नाचेँ । विद्यालय खुल्छ भन्ने सुन्न पाउँदा कताकता लामो समयसम्म लागेको बादल खुलेर आकाश छर्लङ्ग भएजस्तो मेरो मनमा भएको थियो । विद्यालय खुले पनि पूर्णरुपमा कोरोना भने घटेको थिएन । त्यसैले हामीले माक्स अनि स्यानिटाइरको प्रयोग गर्दै विद्यालय गयाैँ र सोही बमोजिम सामाजिक दूरी कायम गरेर करिब दुई महिना विद्यालयमा बितायाैैँ ।
पहिलो दिन म खुसी हुँदै विद्यालय गएँ । लामो समयसम्म घरमै कक्षा लिएकाले मलाई पढाइसम्बन्धी धेरै सामानहरू किन्नुपर्थ्यो । केही समय सामान किनेपश्चात म विद्यालय पुगेँ र आफ्नो कक्षाकोठासम्म प्रवेश गरेँ । त्यसपछाडि म आफ्नी साथी संस्कृतिसँग बसेँ । धेरै समयपछि विद्यालय जाँदा निकै खुसी लागेको थियो । पहिलो दिनका सबै कक्षाहरू पनि रमाइलाे गरी लिन पायाैँ । हामीले सबै साथीहरू सँग बसेर खाजा खायाैँ रमाइलोसँग खेल्यौँ । यसरी नै हाम्रा दुई महिना विद्यालय आएका रमाइला पलहरू बितेँ । अनलाइनमै हामीले धेरैपढीसकेको कारणले गर्दा दुईमहिना विद्यालयमा पढिसकेपछि चैतमा हाम्रो वार्षिक परीक्षा सम्पन्न भयो । चैत ३१ गते हाम्रो वार्षिक परीक्षाको नतिजा पनि प्रकाशन भयो । यतिबेलासम्म फेरिपनि कोरोनाको हल्ला फैलिसकेको थियो । छिमेकी राष्ट्र भारतमा दैनिक रूपमा लाखौ मानिसहरू सङ्क्रमित भएका समाचारहरू आइसकेका थिए । खुला सिमाना भएका कारणले गर्दा हाम्रो देशमा पनि त्याे अवस्था नआउला भन्न सकिँदैनथ्यो । त्यसैले अब हामी अनलाइनमा नै पढ्नुपर्छ कि विद्यालय जान पाउँछाैँ भन्ने कुराकाे दोधारमा थियौँ । जे नहोस् भन्ने लागेको थियो त्यही भयो । वैशाख १६ गतेदेखि अनलाइन कक्षा हुन्छ भन्ने सूचना विद्यालयबाट आयो । अनलाइन कक्षा सुरु पनि भयो । जे होस् हामीले पढ्नुपर्ने थियो सुरक्षित पनि हुनु थियो त्यसैले अनलाइन कक्षा नै उत्तम विकल्प रहेछ । अहिले हामी अनलाइन कक्षा नै रहेका छाैँ ।
अहिले नेपालमा पनि दिनहुँ सङ्क्रमितहरू बढिरहेका छन् । दैनिक ९/१० हजारको हाराहारीमा सङ्क्रमितहरू बढिरहेका छन् । मर्नेको सङ्ख्मामा पनि वृद्धि भइरहेको छ । त्यसैले हामी सबै सावधानीका साथ घरमै बसेर सिक्नुपर्ने अवस्था आएको छ । त्यसैले हामी सुरक्षित हाेऔँ स्वस्थ रहौं भन्दै अपनाउनुपर्ने सम्पूर्ण सुरक्षाका मापदण्डहरू पूरा गरी घरमा बसाैँ । किनकि अबका दिनमा कहिले के हुन्छ भन्न सक्ने अवस्था छैन ।
