समाजसेवा

Written by: Pranjal Khatiwada - 2022013, Grade X

Posted on: 21 March, 2021

समाज वा जनताको सेवा गर्ने असल मनसायका साथ अरूको भलाइका लागि गरिने कार्य नै समाज सेवा हो । समाजसेवामा  निजी स्वार्थलाई  ख्याल नगरी अरूको  भलाइका लागि काम काम गरिन्छ  । समाजमा रहेका दीनदुःखीलाई गर्नुपर्ने सेवाको भाव पनि समाजसेवा नै हो । मेरो विचारमा अर्काको सेवा गर्दा जुन आनन्द आउँछ त्यो आनन्दको  कुनै सीमा हुँदैन ।  महाकवि देवकोटाले त्यसै भनेका होइनन् सुख भनेको आफू मेटिएर अरूलाई दिनु हो । 

हाम्रा धर्म संस्कार र संस्कृतिले पनि समाजसेवा गर्नुपर्छ भन्ने संस्कार सिकाएका छन् । हाम्रा धर्मग्रन्थ आदिले पनि समाजसेवामा लाग्न प्रेरणा दिएका छन् । राम, कृष्ण , बुद्ध , येसु ,पैगम्बर    सबैले हामीलाई अरूमाथि दया माया गरी  रोगी दिनदु:खी माथि सेवा गर भन्ने शिक्षा दिएका छन् । त्यस्तै मदरटेरेसा , फ्लोरेन्स नाइटिङ्गेल , स्वामी विवेकानन्द जयपृथ्वीबहादुर सिंह , बालगुरु षडानन्द आदिले पनि समाजसेवामा लाग्न प्रेरणा दिएका छन् ।   

हामीले चाहेमा समाजमा रहेका दीनदुःखीको सेवा गर्न सक्छौँ । प्रत्येक समाजमा रहेका त्यस्ता व्यक्तिका लागि थोरै चन्दा सङ्कलन गर्ने भने वा कुनै संस्थासँग हातेमालो गर्ने हो भने ती सबै असहायहरूले सहयोग पाउँछन् । त्यस्ता  असहायहरूलाई हामीले शिक्षा, स्वास्थ्यलगायत आवश्यकताअनुसार सहयोग गर्न सक्छौँ ।  समाज सेवाले हाम्रो जीवनमा ठुलो सन्तुष्टि प्राप्त हुन्छ । समाजसेवामा लागेका मानिसलाई सबैले आदर सम्मान पनि गर्छन्। 

समाजमा कैयौँ  मानिस रोगी, असशक्त र लुलालङ्गडा भई जीवन बिताइरहेका छन्  । कतिपय मानिस खानलाउन नपाएर, बस्न नपाएर ,छटपटाइरहेका छन् ।  कतिपय मानिस प्राकृतिक विपत्तिमा परेर बिचल्ली बनेका छन् ।  यस्तो अवस्थामा हामीले  आफूले सकेको सहयोग गर्नु  मानवीय धर्म पनि हो । समाजमा अरूको सेवा गर्ने मानिसले नै खास सुखशान्ति प्राप्त गर्दछ । अरूको दु:खमा साथ दिने मानिसलाई ईश्वरले पनि शिरमा राख्छन् भन्ने भनाइ  पनि हामी सबैका लागि उपयोगी छ ।